ديسك توبّي

شايفين .... ده ديسك توبّي

وانا اللى واقف هناك ده ف الباك جراوند وجنبي عربية طبعا مش بتاعتى ف شارع طبعا مش شارعنا يعني مثلا انا هيبقى عندي عربية ب380 الف؟ وساكن ف الميرغنى؟طيب ايه اللى مخلليني قاعد بكتب دلوقتى؟ ما علينا .... نكمل

عادي جدا هتلاقي فيه الريسايكل مع انى مش بستخدمه ... مفيش عندي فرصة تانية لاى فايل اللى بيتمسح مرة ياخد شيفت وديل على طول

وفى ماى دوكيومنتس هتلاقى فولدر كتاباتى اللى اكيد هيبقى فيه الفايل ده وكل شوية افتحه واتفرج واقرا اللى كتبته قبل كدة واعدل فيه يعني من الاخر الفولدر المعذب عندي

كمان هتلاقى فايل الدونلودز وده مش فيه غير شوية صور ملهاش تلاتين لازمة وبتتمسح بالتقادم

كمان الياهو والهوتمايل والاسكايبي والفايرفوكس عادى

وآدي يا سيدي كمان..... ايه ده؟ هى فين؟ كانت هنا على اليمين اه كان في صورة

ايه ده هى  كانت صورة مين؟وتبع مين؟ وجات امتى واتمسحت ازاى؟

آه افتكرت دي كانت صورتك انتى... كانت موجودة على الديسكتوب وانا اللى مسحتها من شوية .... ده انا اساسا فاتح الوورد وبكتب علشان اقولك دلوقتى انها راحت الريسايكل لا لا انا مش بحط حاجة ف الريسايكل دي اخدت شيفت ديليت ايوة علشان علاقتي بصاحبتها انتهت ........ اييييييييييييوة بالظبط انا كنت هكتب حاجة ...  حاجة مهمة ان انتى كمان اتمسحتى ب شيفت ديليت بس ومفيش اي تغيير تانى وهيفضل ديسكتوبّي فيه صورتى على عربية مش بتاعتى ف شارع مش شارعنا وانا واقف مستني ايه يا ترى معرفش

بس يا رب افتكر قبل ما البطارية تفصل ...................

بقلم:أ/هيثم شاهين